მედიკოსებისა და დიეტოლოგების თქმით, ხანგრძლივი მარხვის დროს რაციონალურად უნდა მივუდგეთ მენიუს არჩევას, რათა ორგანიზმს არ ვავნოთ. ბევრ პროდუქტზე უარის თქმას ორგანიზმში მნიშვნელოვანი ნივთიერებების უკმარისობის გამოწვევა შეუძლია. ეს რომ არ მოხდეს, გონივრული კომპრომისი უნდა იპოვოთ და ერთი სახეობის ნივთიერებები, რომლებიც ცხოველური წარმოშობის პროდუქტებშია, ჩაანაცვლოთ მცენარეული საკვებით, რომლებშიც იგივე შემადგენლობაა.
ხორცში შემავალი ცილები შეიძლება შეიცვალოს მცენარეული ცილით, რომელიც მრავლად არის ლობიოში, სოიოში, ბარდაში, თხილში, მანანის ბურღულში, მზესუმზირაში, სოკოში. გარდა ამისა, სისხლს აუცილებლად სჭირდება რკინა, რომელიც ხორცშია, ძირითადად - საქონლის ღვიძლში. თუმცა არის ასევე ბევრ ხილში, ბოსტნეულში, ბურღულეულში.
ორგანიზმის გასამხნევებლად აუცილებელია სხვადასხვაგვარი ფაფეულის მიღება, კარტოფილისა და ბოსტნეულის კერძების. რაფინირებული შაქრის, შოკოლადის, ორცხობილების და ტორტების ნაცვლად კი სიტკბოს ნაკლებობა შეგიძლიათ შეავსოთ ძირითადად ხილით, ჩირეულით, მურაბეულით და თაფლით. შოკოლადს განსაკუთრებით კარგად ცვლის თურმე ფინიკი და ბანანი.
ვინც მშრალ მარხვაზეა, მან იმ დღეებში, როცა შეიძლება მცენარეული ზეთი, ორ სუფრის კოვზამდე მაინც უნდა მიიღოს ეს პროდუქტი, რადგან ორგანიზმის ცხიმზე მოთხოვნილება შეავსოს. სასარგებლოა მზესუმზირის, ზეითუნის, გოგრის და სხვა ზეთები.
რაკი მარხვის დროს არ შეიძლება კვერცხის გამოყენება, ცხობის დროს ცომის სირბილისთვის წარმატებით იყენებენ კარტოფილის ან სიმინდის სახამებელს, ასევე ბანანს.
ასევე ექიმები ურჩევენ, მარხვის დროს ადამიანმა 1,5-2 ლიტრი სითხე მიიღოს დღის განმავლობაში. ეს შეიძლება იყოს არა მხოლოდ წყალი, ასევე წვენები, მწვანე ჩაი, მცენარეული ნაყენები, კომპოტები, კისელი.
მედიკოსებისვე რჩევით, მკაცრი მარხვა არ არის რეკომენდებული ორსულებისთვის, მეძუძური დედებისთვის, პატარა ბავშვებისთვის, ასევე ქრონიკული დაავადებების მქონეთათვის. ამიტომაც, დამოუკიდებლად ნუ მიიღებთ მარხვის გადაწყვეტილებას. გაიარეთ კონსულტაცია ექიმთან და მოძღვართან. მარხვა ხომ ის არ არის, თუ რას ვჭამთ, არამედ ის, თუ რისი მსხვერპლად გაღება შეგვიძლია რწმენისათვის, არა საკუთარი ჯანმრთელობის საზიანოდ.
რაც შეეხება ბავშვებს, პატარებისთვის მარხვა ნაკლებ რეკომენდებულია. თუმცა გარკვეულ შემთხვევებში ბავშვებიც მარხულობენ. ბავშვის მარხვა იმაში მდგომარეობს, რომ ძირითადად ტკბილ და მავნე პროდუქტებზე თქვან უარი. ასევე ძირითადი აქცენტი უნდა გადაიტანოთ არა დიეტაზე, არამედ სურვილებისა და ჩვევების შეზღუდვაზე: ინტერნეტის შეზღუდვა, სხვადასხვა ელექტრონული გასართობის. და რასაკვირველია, მარხვა ბავშვისთვის უნდა იყოს შეგნებული და ნებაყოფლობითი.
loading...
